لمناسبة عيد المرأه العالمي …!!!
اخترت أن اكتب عن بطولة المرأه العراقيه ضد الإرهاب والارهابين وتحرير أرضها بدمها الطاهر
الى/ المرأه العراقيه الشهيده التي خضبت بدمها الطاهر نياسم ( ناحية العلم) … الشهيده البطله الشيخه ( أُميمه الجباره) .. التي قارعت الدواعش بمعيار العزةِ والكرامةِ والشرف ..
……… (( أُميمه ..!!))
لفة الچرغد أٌميمه ..!! وصار چرغدها علم
وعالزند رشاشه تلعب ..
ز ووكَفه للتاريخ .! خط ألهه القلم
نقش بالنور .. أعله صفحات المعارك
كل حرف بحروف أسمها
أصبحت للمحتل سهم
هـاي أُميمه ..!!
المارجف بيها الوريد ..! وللزلم نزفت همم
وظلت البرنو تهلهل .. بيد تجفه ..!
ومنها ما واحـد سـلم
وضحَّت الروح أبأمانه ..!!
ومسحت أبشريانها كل الذمم
هـاي أُميمه ..!
الرسمت أبدمها شهاده ,,
وشرّفت كَـاع العـلم
هـاي أُميـمه .. السطرت تاريخ ناصع بالقيّم
وهـدّت أكحيلة رسنها ..!!
وسابكَت ريح العماله
وهدّمت ساس الصنم
هـاي أُميمه ..!!
الشرفّت بيـرغ أهلـها
وفرحت الدنيه بصورها
ولأجل تحرير الارض … كَالت نعم
هـاي .!! من رشوا اهلها أبماي
رشّـت هيـّه دم !!
هـاي أُميمه ..!!
الدفنت أحلام الدواعش ..!
من بدت بزماطهه تصعد قمم
وحلفت أبــدّر الحليب الرضعته ..!!
أمن أهل الشـيّم
وبي سگت مرضـع أهلها ..!!
بـدم شهاده .. ونفذت ذاك القسم
هـاي أُميمه ..!
الصـار جرغدهه مفاخـر
بي عمت كل الخناجر
و أنمسـح بيه الوهـم
هـاي أُميمه ..!!
وحـده من تاريخ أهلنّه
البي صفه البارود مضغه ..!!
بيـوم فارسـها أنفطـم
هــاي !! من رشوا أهلهه ابماي
رشّت هيـّه دم ..!!
بقلمي.. الشاعر حاكم الأسدي.. العراق
- تعليق
- إعادة التدوين
-
اشترك
مشترك
ألديك حساب ووردبريس.كوم؟ تسجيل الدخول الآن.
أكاديمية النجاح للتدريب والتنمية 
أضف تعليق