….. ( كحل.. ورموش.. ودمع)
هــاك أخذ ترجيّة أذن ..!!
الماوصل ليها السمع
وهــاك أخذ كحلة ارموش
المايرطبها الدمع
وهــاك شريان الدليل
وحشّـه لو ما بـي نفع
وهــاك نيـط أهروش روحي
.. وشوف !! لو مابيها لهفه
أعتقد محتاجه الشلع
وهــاك كَلبي العاش ريعان الولاده
وبي صفتله الونه عاده
وحسـره شغـلتها اللسـع
وهــاك فكري الهـام غفله
ومفتخر مشغول بأصلّه
وگصـه لو ما بي فرع
وهــاك مـوكَـ العين ..!!
لو ما فاض دمعه
أجروفه تستاهل قـلع
وهــاك حنـية كَلب ..!! مفطومه بيك ..!!
وناويه أتشبعك رضع
وهــاك ذرعانـي الطـريه
الحضنت أبچفها المنيه
وعـلگـت العشره شمع
وهاك مهجه .. أتناثرت بهموم ضيم
ورد حزنها وصار غيم
وصفت متعوده الصدع
وهـاك عـد نبض الوريد
الهوىٰ بشهگـات المعاتب
والجرح صاير دلـع
وهـاك أخذ صفطة أضلوعي
وشدهن بشريان لوعـي
وحطـهـن الصـدرك درع
حتى أطمّن روحي سكته
والكَلب عفته اعله بخته
من صفـه أيحضـنه الضـلع
وهااااااااك أخــذ ..!! وأنطيني
حــكَـ المشتهاتي ..!!
الضاعت وغثـها البلع
بقلمي… الشاعر حاكم بدر الأسدي.. العراق
أكاديمية النجاح للتدريب والتنمية 
أضف تعليق