بشعر العامية المصرية .
( غير لائق اجتماعيا )
يا أبو قلب أخضر ليه انتا ناوي تنتحر
فسر وقوللي هوا انتا غاوي تشتهر
ولا الحياه ما فيهاش دوا والصبر فيها بينكسر
لملم جراحك ما بقاش هوا على هواك لو تفتكر
عاذرك أنا علشان لقيتك فاهم علومك بالتمام
وفرحت انا لما لقيتك بتمد خطوه للأمام
نفسك تكون سفير لبلدك وتعبت من كتر الملام
حقك يا إبني مين يشوف ولا يسمع دا الكلام
أنا حزين على قرار انتا اتخذته وانتهى
قرار تغادر فيه الحياه ويبقى عمرك انتهى
لما خلا كشف الأسامي من إسمك لما شفتها
ليه تنتحر كنت انتظر شكواك كان ممكن حلها
خريج سياسه وإقتصاد وكان ترتيبه فوق فوق
والحاله والعيشه بالكاد لكن طموحه كان فوق
ليه تظلموه وتحرموه وتلففوه حوالين طوق
وتطردوه وتجرحوه من غير أدب من غير ذوق
الشاب طالع م الأوائل وطموحه أصلا كان كبير
صعبان عليه ما حد سائل في شكوته ولا وزير
الهم زاد واليأس ساكن في غرفته ما عاد يطير
ضيع حياته برغبته ترك الأسى وأثره المرير
با كل مسؤول في البلد وضميره حيا
يا كل مطحون والسبب أعياه عيا
جملة واحده اتسببت في موته حيا
والصدمه كانت : ( غير لائق اجتماعيا )
——————————
بقلم د / عبد الرحمن فتحي الحناوي .
من مصر
الخميس ١٧ من مارس سنة ٢٠٢٢
أكاديمية النجاح للتدريب والتنمية 
أضف تعليق