القلب الطيب
إبني حبيبي
يا نور عيني
يا تري هتيجي تاني وتلاقيني
يا قلبي يا روحي
يا طرح عمري وسنيني
هشوفك تاني
إمتي زي النهارده
وافضل شايله شوقي وحنيني
يعني خلاص خلصت الحكايه
جبت الهديه
ورايح تقول إبقي قابليني
يوم واحد في السنه
تجيبلي حلاوه معاها القساوة
وباقي السنه تعاديني
شوف ساعتك كام
قوم يلا قوام
روح لعيالك إلي ما ملتش منهم عيني
وخد معاك الهديه
كفايه هم وقسيه
كفايه بارت زرعتي وطيني
بس إوعي تنسي تودعني
يا تري هتيجي تاني تلاقيني
لسه فاكر نمرة التليفون
أنا إحترت فيك وإحتار دليلي
ما كانش لازم تكلف نفسك
وتشيل حبة هلاهل وتجيني
كان كفايه أشوفك كل يوم
كان كفايه يا بن بطني وأنيني
فين ولادك
أكيد عند حماتك
الكامله بنت الكامله بنت الأصول
كلمتني النهارده ووعدتني هتجينى
مع السلامه يا إبني
مع السلامه يا نور عيني
إنت بتعيط يا وله
قوم إوعي تبوس رجلي
سامحيني يا غاليه سامحيني
ما إنت عارفه قسوه أيامنا وسنيني
من الشغل للبيت
وزي ما روحت زي ما جيت
وكانك يا أبو زيت ما غازيت
دنيا لهايه وسهايه
وكل واحد ليه ميت عذر وحكايه
رايح فين يا وله
بلم هدومك قعده لواحده تاني ما فيش
واي دمعه منك تقتلني ما تخليني اعيش
بس والنبي تسامحيني
خلاص يا قلبي يا نور عيني
طول عمري قلبي مسامحك يا وله
يا هنا قلبي ودوا جروحي
حبيبتي يا غاليه بحبك
عبد الفتاح عبد الرحمن والي
أكاديمية النجاح للتدريب والتنمية 
أضف تعليق