لَا تِيأَسْ …// بقلم الشاعر : حسن العلوي مفهوم

لَا تِيأَسْ …

مَنْ يُومْ دْراجْ ما شَافْ فْرَاجْ
مَا شَافْ اقْمَارْ تَشْتِي بَ انْوارْ

الطّْريقْ طْويلْ مَلْوِي كَ فْجَاجْ
لَحْمَلْ ثْقِيلْ مَنْ ظَهْرُو مَدْبَارْ

يَعْيا يَسْقِي مَنْ دَمْعُو لَمْراجْ
وَ نْهَارْ حْصَادُو يَجْنِي لَمْرَارْ

لَهْمُومْ فَ دْوَاخْلُو تَغْلِي مُقْرَاجْ
وَ رْوَابَزْ لُوجَاعْ تَگْدِي لَجْمَارْ

كِيفْ الْوَرْقَة سَايَگْهَا لَعْجَاجْ
فِينٍ دَّاهَا تَتْبَعْ لَمْسَارْ

مَنْتُوفْ الرِّيشْ بْلَا مَا كَ دْجَاجْ
مَذْبُوحْ بْ مُوسْ حَافِي غَدَّارْ

هَاذَا حَالُو مَنْ يُومْ دْرَاجْ
مَسْكِينْ بْلَادِي خَانْتُو لَقْدَارْ

خْطَفْ حَقُّو مَنْ حَلْقُو حَلَّاجْ
وَ رْمَى لِيهْ تْبَنْ يَقْتَاتُو كَ ابْقَارْ

لَجَّمْ فَمُّو ، بَلْجُو تَبٍلَاجْ
وُ زَادْ عَگْلُو بَحْبَلْ لَقْهَارْ

غَمْلُو بَكْذُوبْ بَوَّقْ لُو لَمْزَاجْ
وُ فْعِينِينْ الدِّيكْ وَرَّى لُو لَخْضَارْ

كُلْ مَا زَرْعُو مْنَ احْلَامُو يَخْمَاجْ
مَا يْلِيهْ زْهَرْ غَلْبَاتُو لَقْدَارْ

أَصْبَرْ يا مَسْكِينْ يَمْكَنْ تَفْرَاجْ
تَطْلَعْ الشَّمْسْ يَبْدَا النّْهَارْ

مَنْ بَعْدْ ظْلَامْ تْنَوَّرْ لَسْرَاجْ
تْحَنِّي لَحْلَامْ كِ عْمَارْتْ الدٌَارْ

نُوصِيكْ قَاوَمْ ، الْيَأْسْ رْتَاجْ
يِلَا رْشَى خَشْبُو مَا شَدُّو مَسْمَارْ

ما يدوم ضيق يجي لفراج
الما لمخوض يرجع قرار

لا تيأس اليأس ارتاج
يلا رشا ما يشدو مسمار

مَا يَنْطَاعْ حْدِيدْ مَنْ بَعْدْ يَعْوَاجْ
غِيرْ بْدَقَّة وُ صَهْدْ النَّارْ

حسن العلوي مفهوم
مراكش / فبراير 2017 – بتعديل .