…….هات الورق ….
……هات القلم…….
واكتب ما سوف يملى عليك
لا محوا يأتي بعد تسطير الورق
اكتب بداية …
سبحان من شق الفلق
اكتب كمان عن كل دقة في القلوب
اكتب وجع ما يفوقوش غير الشروق
وكله داق وكله حالف يوم يفوق
اكتب كمان
سطر كلام العاشقين
وعيون تحاور كل لحظة وكل حين
واكتب عن اللي شاف أسى والمجروحين
بتقول لمين ؟
للطيبين ، للمخلصين، للسهرانين ، للتعبانين ، للمخدوعين .
اكتب كمان عن كل قلب
عن قلب قاسي وقلب حب
عن وعد مليان كله كدب
عن شجرة شاهدة فى المكان
عن حد خان
عن حد هان
عن حد كافح من زمان
عن حد بايع للي صان
اكتب كمان،،،
عن دعوة من أم لشهيد
عن ضربة كانت من قَريب مش من بعيد
عن حد بيخاف م الإله يوم الوعيد
وعن حد قلبه من حديد
اكتب كمان ،،،
عن يوم يوم مفارق
وعن اللي بيداري الحقايق
وعن اللي سكران واالى فايق
وعن اللي عايش يلتهم لحم الخلايق
اكتب كمان ،،،
عن اللي كان أيام زمان
عن طفل شاب قبل الأوان
وعن عجوز صابه الجنان
وعن اللي بايع اهل بيته ورامي لحمه للهوان
اكتب كمان ،،،
عن الرجولة والأدب
وعن اللي ما يردوش عتب
وعن اللي بيخلي التراب يصبح دهب
وعن اللي باع من غير سبب
مستني ايه
وإيه العجب
إنك تدون مختارات
من شاب يوم صابه التعب
السفير
محمد نبيل عبدالرسول
مصر
أكاديمية النجاح للتدريب والتنمية 
أضف تعليق